नेपाल प्रिमियर लिग (एनपिएल)को दोस्रो संस्करण अन्तिम चरणमा पुगेको छ । मङ्सिर १ गतेदेखि सुरु भएको प्रतियोगिताको उपाधि भिडन्त शनिबार कीर्तिपुरस्थित त्रिवि अन्तरराष्ट्रिय क्रिकेट रङ्गशालामा हुने भएको छ । दिउँसो ३ः३० बजे सुरु हुने फाइनल खेलमा साविक उपविजेता सुदूरपश्चिम रोयल्स र लुम्बिनी लायन्स उपाधिका लागि प्रतिस्पर्धा गर्नेछन् ।
सुदूरपश्चिम रोयल्सले प्रतियोगिताभरि सन्तुलित र प्रभावशाली प्रदर्शन गर्दै फाइनल यात्रा तय गरेको हो । पहिलो क्वालिफायरमा विराटनगर किंग्सलाई ७७ रनको फराकिलो अन्तरले पराजित गर्दै सुदूरपश्चिमले आफ्नो दाबेदारी थप बलियो बनाएको थियो । कप्तान दीपेन्द्रसिंह ऐेरीको नेतृत्वमा रहेको टोली बलिङ र ब्याटिङ दुवै पक्षमा स्थिर देखिएको छ, जसले उपाधि जित्ने सम्भावनालाई बल दिएको छ ।
उता लुम्बिनी लायन्सले पनि दोस्रो क्वालिफायरमा विराटनगरलाई ४० रनले पराजित गर्दै फाइनल स्थान सुरक्षित गर्यो । पहिलो क्वालिफायरमा सुदूरपश्चिमसँग पराजित भए पनि विराटनगरले दोस्रो अवसर पाएको थियो, तर लुम्बिनीको दबाबयुक्त प्रदर्शनका अगाडि टिक्न सकेन । रोहित पौडेलको कप्तानीमा रहेको लुम्बिनी यस सिजन अघिल्लो संस्करणको कमजोरीलाई सुधार्दै अघि बढेको देखिन्छ ।
गत संस्करणमा लिग चरणमै बाहिरिएको लुम्बिनी यसपटक उपाधि जित्ने लक्ष्यसहित मैदान उत्रिएको छ । यद्यपि लिग चरणमा यी दुई टोलीबीच भएको भेटमा सुदूरपश्चिमले ७ विकेटको सहज जित दर्ता गरेको तथ्यले फाइनलमा पनि सुदूरपश्चिमलाई मनोवैज्ञानिक अग्रता दिलाउन सक्छ । अर्कोतर्फ, फाइनल जस्तो ठूलो खेलमा लुम्बिनीले रणनीति र संयममा सुधार गर्न सके खेल रोचक बन्ने अपेक्षा गरिएको छ ।
प्रतियोगिताको विजेताले रु एक करोड १० लाख नगद पुरस्कार प्राप्त गर्नेछ भने उपविजेता टोलीले रु ५१ लाख पाउनेछ । तेस्रो स्थान हासिल गर्ने टोलीले रु २५ लाख र चौथो हुने टोलीले रु १५ लाख पुरस्कार प्राप्त गर्ने व्यवस्था गरिएको छ । नेपाल क्रिकेट सङ्घको आयोजनामा सम्पन्न यस प्रतियोगितामा आठ टोलीको सहभागिता रहेको थियो, जसले घरेलु क्रिकेटको स्तर उकास्न महत्वपूर्ण भूमिका खेलेको छ ।
अब शनिबारको फाइनल खेलले दोस्रो यामको एनपिएललाई नयाँ विजेता दिने कि सुदूरपश्चिमलाई पहिलो उपाधि दिलाउने भन्ने टुंगो लगाउनेछ ।
